डीएसपीलाई कमलनयनाचार्यको चेतावनी : ‘हस्तक्षेप भयो भने एक हप्ता पनि तिमी टिक्दैनौ।’

चक्काजाममा प्रहरी मुकदर्शक। हिन्दू राष्ट्रबाट पछि नहट्ने हिन्दूवादीको उद्घोष

मंगलबार इटहरीमा संविधानमा हिन्दू राष्ट्र लेखिनुपर्ने माग राख्दै चक्काजाम गरेर आन्दोलित हिन्दूवादीलाई लखेटेको प्रहरी बुधबार भने मुकदर्शक बन्यो।
इटहरीमा श्री निवासाचार्य तथा वैदिक सनातन हिन्दू राष्ट्र नेपाल संयुक्त संघर्ष समितिको अगुवाईमा भइरहेको आन्दोलनमा बुधबार धार्मिक गुरु कमलनयनाचार्यसमेत सहभागि भएपछि मंगलबारको जस्तो प्रहरी हस्तक्षेप भएन।

सधैं झै इटहरी चौकमा सवारी आवागमन ठप्प पार्दै कार्यक्रम सुरु भएपछि प्रहरी चारैतर्फ राजमार्गमा सवारी डाइभर्ट गर्न खटिएको थियो। बुधबार पनि जुलुस निस्कने भनिएपछि सुरक्षा सक्रियतासँगै प्रहरी हस्तक्षेप हुने सर्वसाधारणको अनुमानविपरीत भाषण, नाचगान र र्‍यालीसहित कार्यक्रम गरिएको थियो।
जुलुसअघि पुराणस्थलमा भएको कार्यक्रममा बोल्दै कमलनयनाचार्यले इटहरीका प्रहरी प्रमुख डिएसपी विनोद शर्मालाई हस्तक्षेप नगर्न चेतावनी दिएका थिए। ‘आज पनि हस्तक्षेप भयो भने एक हप्ता पनि तिमी टिक्न पाउने छैनौ।' सर्वसाधारणले निर्ममतापूर्वक कुटिएको गुनासो गर्दै गर्दा उनले भने, ‘ल हेर्नुस् डाम छ भन्दै हुनुहुन्छ आमाहरुले। हैन भन्दै थियो अघि मलाई मैले निलम्बन गर अनि मात्र अरु बाचा गर्नेछु भनेर गृहमन्त्रालयका प्रवक्तासँग कुरा गरेको थिएँ।'
डलर खाएर धर्म निरपेक्ष :  कमलनयनाचार्य
कार्यक्रममा बोल्दै कमलनयनाचार्यले शान्तीपूर्ण आन्दोलनमा हस्तक्षेप भए धर्मयुद्ध हुने चेतावनी दिए। उनले नेपालका नेताहरुले देवभूमीहरुको विकास गर्नु त परै जाओस्, उल्टो उपेक्षा गरेको भन्दै नेपालका नेताहरुलाई ‘नालायक' भन्दै विरोध गरे।
‘विदेशीले गौतमबुद्ध भारतमा जन्मिएका हुन् भनिरहँदा तिमीले बोल्न सकेनौं, मानसरोवर तिब्बतको हुँदा तिमी चुप लाग्यौ,' उनले भने, ‘संसारमा एकमात्र हिन्दू राष्ट्रको पहिचान पनि समाप्त पार्न लागेका छौ, तिमीहरुले के गर्न लागेको हो?'
उनले जनताका इच्छाविपरीत धर्म निरपेक्ष घोषणा गर्नेहरु नेपालबाट भाग्नुपर्ने अवस्था आउने चेतावनी समेत दिए। ‘जसलाई आफ्नी आमाको दूधमा गर्व छैन, नेपालमा बसेर अरुको वकालत गर्ने नालायकहरुले यहाँबाट भाग्नुपर्नेछ,' उनले भने।
उनले नेताहरु लर्खरिएको बोलीले धार्मिक स्वतन्त्रता भन्न थालेको बताउँदै धर्म निरपेक्ष भन्दा धार्मिक स्वतन्त्रता शब्द खतरनाक र दूधमा मिलाएर दिएको विष भएको बताए। उनले छँदाखाँदाको हिन्दू राष्ट्र बदल्नुमा नेताहरुले धेरै डलर र विदेशीको दूध खाएको आरोप लगाउँदै हिन्दू राष्ट्रका लागि मर्न पनि तयार रहेको बताए।
उनले इटहरीलाई धर्म नगरी बनाइने उद्घोष गर्दै गर्दा इटहरी को सिमानामा सुन्दर दुलारी नगरपालिकामा नयाँ वृन्दावन बनाइरहेका दीनबन्धु शास्त्रीजी महाराजले इटहरी चाँडै धार्मिक नगरी बन्ने बताए। उनले नेपालका साँसदहरुलाई जुम्राको संज्ञा दिँदै भने, ‘जुम्रा धेरै भयो भने आमा दिदीहरुले बाँसका काइयाले स्वाई स्वाई पार्दै निकाल्नुहुन्थ्यो, यी स्वामीहरु भनेका तिनै बाँसका काईया हुन्, खबरदार।'
उनले हिन्दू राष्ट्र घोषणा गर्न माग गर्दै गर्न नसक्ने भए धन सम्पत्तीको आडमा कमाएको पीआर लिएर विदेश जान चेतावनी दिएका थिए।
सद्भाव खल्बलिने चिन्ता
इटहरीमा हिन्दू राष्ट्रको आन्दोलन चर्किँदै जाँदा भएको प्रहरी हस्तक्षेपलाई लिएर सुनसरीका राजनीतिक दलका प्रमुख तथा प्रतिनिधीहरुले बुधबार संयुक्त वक्तव्य निकाल्दै सद्भाव भड्कन नदिन आग्रह गरेका छन्।
मानवअधिकार सञ्जाल सुनसरीको समन्वयमा बसेको बैठकले शान्तिपूर्ण विरोध गर्न पाउने अधिकारलाई हस्तक्षेप नगर्नसमेत प्रशासनलाई आग्रह गरेको छ।
बैठकपछि जारी वक्तव्यमा भनिएको छ, ‘आफ्ना मागहरु शान्तिपूर्ण ढंगले राख्न, जात, धर्म र सम्प्रदायका नाममा द्वेष नफैलाउन र अरुको विरोध नगरी आफ्ना माग राख्न, सबै जात, धर्म, भाषा, संस्कृतिको सम्मान गर्न, संघर्षका कार्यक्रम शान्तिपूर्ण बनाउन, राष्ट्रिय झण्डाको दुरुपयोग नगर्न, राजनीतिक दल बिचको सम्बन्ध सुमधुर बनाउन र नागरिकको आफ्ना माग राख्न पाउने र असहमतिहरु सम्वादको विधि र प्रक्रियाबाट समाधान गर्न सबैलाई आग्रह गरिएको छ।' वक्तव्यमा सुनसरीका राजनीतिक दलका साथै महिला अगुवा तथा इन्सेकका प्रतिनिधिहरुले हस्ताक्षर गरेका छन्। भिडियो हेर्न तलको बाकस थिच्नुहोस

Write Comment Below:

Disclaimer: Please note, this is an online news portal, All of these images/videos found here from 3rd party video/image hosting sites such as YouTube.Com, Vimeo.Com, DailyMotion.Com, Blip.Tv, We do not host any videos and some photos. Please contact to appropriate video/image hosting site for any content removal.