योगेशले भने– केपी ओलीजस्तो सक्षम क्याप्टेन कुनै पार्टीसँग छैनन्

 एमाले सचिव योगेश भट्टराईले पार्टी भित्रको खटपटलाई क्षणिक भएको वताउँदै एमाले केपी ओलीको कमाण्डमा विजय अभियानमा निस्केको वताएका छन् ।

 अनलाइन पत्रकारसँग सोमबार बानेश्वरमा कुरा गर्दै भट्टराईले ओलीको नेतृत्वमा एमालेले लगातार तीनवटा निर्वाचन जित्ने ठोकुवा गरे ।

‘हामी हाम्रो पार्टी अध्यक्ष केपी शर्मा ओलीको क्याप्टेनसिपमा तीनवटा चुनावमा जाँदैछौं’ भट्टराईले भने, ‘उहाँ एमालेको मात्रै होइन नेपाली राजनीतिको सक्षम क्याप्टेन हो । क्याप्टेनले आफूले खेलेर मात्र हुँदैन । अन्य खेलाडीले कस्तो खेल्दैछन् भनेर पनि हेर्नु पर्छ । उहाँ सक्षम कमाण्डर हो ।’

उनले एमालेमा केही खटपट भए पनि त्यो अस्थायी रहेको र हस्तिनापुरको रक्षा गर्न पाण्डवहरु उत्रेजस्तै एमाले एकजुट भएर चुनावमा होमिने वताए । ‘एमालेमा केही खटपट होला । तर, द्रौपदीको चीर हरण हुँदा ५ पाण्डवजस्तै भएर उत्रिन्छ’ भट्टराईले भने, ‘एमालेमा रहेका नेताहरुको स्तरका वरिष्ठ नेता अरु पार्टीमा छैनन् ।’

उनले एमाले भित्र आन्तरिक झगडा देखाएर खुसी नहुन अन्य पक्षलाई चेतावनी दिए । ‘एमाले भित्र दुई दिन आपसमा लड्छन् लड्छन् जस्तो देखिन्छ’ भट्टराईले भने, ‘तर, एमाले हस्तिनापुर जोगाउन एकैठाउँमा उभिएर भिड्छ ।’ उनले पार्टी अध्यक्ष केपी शर्मा ओली स्वास्थ्योपचारबाट फर्केपछि काठमाडौं महानगर पालिकामा उम्मेदवार चयन गरिने वताए ।

Write Comment Below:

Disclaimer: Please note, this is an online news portal, All of these images/videos found here from 3rd party video/image hosting sites such as YouTube.Com, Vimeo.Com, DailyMotion.Com, Blip.Tv, We do not host any videos and some photos. Please contact to appropriate video/image hosting site for any content removal.