अाेमनमा नेपाली महिला बिक्रीः मूल्य ‘एक लाख ३० हजार’,गोंगबुको होटलमा सेल्टर

काठमाडौं- वैदेशिक रोजगारको प्रलोभनमा पारेर नेपाली युवतीलाई एक लाखभन्दा बढी रुपैयाँ लिई बिक्री गर्ने गिरोहका चार सदस्य पक्राउ परेका छन्।

 प्रहरी केन्द्रीय अनुसन्धान ब्युरोको टोलीले भारतको दिल्ली हुँदै नेपाली युवतीलाई ओमन पुर्‍याएर बिक्री गरेको अभियोगमा तोकबहादुर तामाङ, मेदनीप्रसाद प्रसाईं र निमा लामालाई पक्राउ गरेको हो। यसअघि नै सोही गिरोहका विष्णु लामा पक्राउ परेका थिए।

ब्युरोकी एसपी मीरा चौधरीका अनुसार प्रारम्भिक अनुसन्धानमा उनीहरुले नेपालका विभिन्न नाकाबाट भारतको दिल्ली पुर्‍याएर हवाईमार्ग हुँदै युवती ओमन पठाउने गरेको बताएका छन्। ‘यसबापत उनीहरुलाई ओमनको दलालले प्रतिमहिला एक लाख ३० हजार रुपैयाँ दिने गरेको खुलेको छ’, चौधरीले भनिन्।

पक्राउ परेकाहरु नेपालमा बसेर वैदेशिक रोजगारीमा जाने प्रयासमा रहेका महिला खोज्ने, उनीहरुलाई राम्रो कामको प्रलोभनमा पारेर ओमन जान राजी गराउने र राहदानी बनाएर भारतको दिल्लीसम्म पठाउन सक्रिय थिए।

दिल्ली पुगेका महिलालाई हवाई यात्राको टिकट मिलाएर ओमन पठाउने समूह र घरेलु कामदारको आवरणमा बिक्री गर्ने ओमनमा सक्रिय समूहका सदस्य भेटिएका छैनन्।

ब्युरोका अनुसार पक्राउ परेकामध्ये सिन्धुपाल्चोक सीपापोखरीका सरोज भन्ने तोकबहादुरले वैदेशिक रोजगारीमा जान चाहने महिलालाई काठमाडौं ल्याएर होटलमा राख्ने र राहदानी बनाइदिएर दिल्ली पठाउने गर्दै आएका थिए।

झापाका मेदनीले सरोजले पठाएको राहदानी संकलन गर्ने र काठमाडौं–दिल्लीको टिकट मिलाउने काम गर्थे। सिन्धुपाल्चोक मार्मिङका निमाले महिलाको विवरण र राहदानी कुरियर गरेर दिल्ली पठाउने गर्दै आएका थिए ।

गोंगबुको होटलमा सेल्टर

मानव बेचबिखनमा सक्रिय समूहले रोजगारीको प्रलोभन देखाएर ओमन पठाउन दुई युवतीलाई गोंगबुको गेस्ट हाउसमा राखेको सूचनाको आधारमा ब्युरोले छापा मारेर बुधबार उद्धार गरेको थियो।

उद्धार गरिएका महिलाको बयानमा खुलेको नाममध्ये एक थिए निमा। उनी २७ जना महिलालाई अवैध रुपमा विदेश पठाएर बिक्री प्रयास गरेको अभियोगमा ब्युरोको खोजी सूचीमा थिए।

२०७२ साउन ५ मा अवैध रुपमा खाडी मुलुक जान तयारी अवस्थामा रहेका २७ नेपाली युवती नयाँदिल्लीमा फेला परेका थिए । भिजिट भिसामा दुबई, कुवेत र इराकको कुर्दिस्तानमा घरेलु कामदारको आवरणमा बिक्री गर्न भारत पु¥याइएका नेपाली महिला समातिएपछि भारतीय प्रहरीले नेपाल पठाएको थियो।

ती युवतीको बयानमा सुशील भन्ने सुजिल राई, राजबाबु श्रेष्ठ, सानु लामा र धनबहादुर भन्ने दानबहादुर क्षेत्रीसँगै विष्णु लामा र सानुको नाम खुले पनि विष्णु र सानु फेला परेनन्। अन्य चारजना पक्राउ परेका थिए। उनीहरु पुर्पक्षका लागी केन्द्रीय कारागार पुगे। फरारमध्येका सिन्धुपाल्चोक गुम्बाका विष्णु काठमाडौंको गोकर्णेश्वरमा गत वैशाख ८ मा पक्राउ परे।

अनुसन्धानमा विष्णुले कुवेत पुर्‍याएर बिक्री गर्न फसाइएकी एक महिलाको २०७२ फागुनमा उद्धार भएको भेटियो। ती महिलाले बयानमा विष्णुको नाम लिएकी थिइन् । विष्णुसँगको बयानमा नेपालमा महिला खोज्ने र आवश्यक दस्तावेज दिल्ली पठाउन उनलाई निमाले सघाउने गरेको खुलेपछि प्रहरी निमाको खोजीमा खटियो। निमाको खोजी गर्दा अन्य दुई नयाँ अभियुक्त समातिए । साथै उनीहरुको प्रलोभनमा परेर ओमन जान राजी भएका दुई महिलाको जीवनसमेत जोगियो।

रोकिएन दिल्ली रुट

घरेलु कामदारको आवरणमा खाडी र अफ्रिकी मुलुकसम्म नेपाली युवती पु¥याई बिक्री गरेर जोखिमपूर्ण कामका लगाउने गरेको खुलेपछि नेपाल र भारतको गृह सचिवस्तरीय बैठकले चार वर्षअगाडि ‘दिल्लीबाट हवाईमार्ग हुँदै खाडी क्षेत्रसमेतका सात देश जान चाहनेका लागि ‘नो अब्जेक्सन लेटर’ अनिवार्य गरेको थियो ।

स्थलमार्ग हुँदै सहजै दिल्ली जाने र त्यहाँबाट भिजिट भिसामा द्वन्द्वग्रस्त इराकी क्षेत्रमा समेत नेपाली महिला पुग्ने गरेको खुलेपछि दुवै देशका सुरक्षा निकायले विमानस्थलमा निगरानी बढाउने निर्णय गरे पनि मानव तस्करीमा दिल्ली रुटको प्रयोग अझै रोकिएको छैन ।

पक्राउ परेका अभियुक्त र उद्धार गरी ल्याइएका महिलाको बयानमा मानव तस्करीमा सक्रिय समूहले भारतको दिल्ली र मुम्बईको हवाईमार्गबाट श्रीलंका पु¥याएर त्यहाँबाट खाडी मुलुक लैजाने गरेको खुलेपछि प्रहरीसहितको सरकारी टोली श्रीलंका पुगेर अनुसन्धान गरी फर्किएको थियो ।

टोलीले श्रीलंकाको विभिन्न मोटेलमा खाडी जाने पर्खाइमा रहेका दुई दर्जनभन्दा बढी नेपाली महिला भेटेको थियो । नेपाल फर्केर टोलीले दिल्ली विमानस्थलबाट श्रीलंका जान समेत कडाइ गर्न सरकारको ध्यानाकर्षण गराए पनि कार्यान्वयनमा आएन ।

‘नेपाली युवतीलाई खाडीलगायतका देशमा पु¥याएर बिक्री गर्ने गिरोहले अझै पनि भारतको दिल्ली विमानस्थल प्रयोग गर्ने गरेको देखियो,’ एसपी चौधरीले भनिन्, ‘पक्राउ परेको गिरोहले समेत त्यही रुटको प्रयोग गर्ने गरेको खुलेपछि विस्तृत अनुसन्धान गर्दैछौं।

Write Comment Below:

Disclaimer: Please note, this is an online news portal, All of these images/videos found here from 3rd party video/image hosting sites such as YouTube.Com, Vimeo.Com, DailyMotion.Com, Blip.Tv, We do not host any videos and some photos. Please contact to appropriate video/image hosting site for any content removal.